బంగ్లాదేశ్‌లో హిందూ వితంతువుపై దాడి... “మనసు కలచివేసింది” అన్న ధావన్

బంగ్లాదేశ్‌లో హిందూ మైనారిటీలపై జరుగుతున్న దారుణాలు మరోసారి ప్రపంచాన్ని షాక్‌కు గురి చేశాయి. తాజాగా అక్కడ ఒక హిందూ వితంతువుపై ఇద్దరు వ్యక్తులు సామూహిక అత్యాచారానికి పాల్పడటమే కాకుండా, ఆమెను చెట్టుకు కట్టేసి జుట్టు కత్తిరించిన ఘటన తీవ్ర ఆగ్రహాన్ని రేకెత్తిస్తోంది. ఈ అమానుష ఘటనపై టీమిండియా మాజీ క్రికెటర్ శిఖర్ ధావన్ తీవ్రంగా స్పందించారు.

ఈ కిరాతక ఘటన గురించి తెలుసుకున్న వెంటనే ధావన్ ‘ఎక్స్’ (ట్విటర్) వేదికగా తన ఆవేదనను వ్యక్తం చేశారు. “బంగ్లాదేశ్‌లో ఒక హిందూ వితంతువుపై జరిగిన క్రూరమైన దాడి గురించి చదివి నా మనసు కలత చెందింది. ఎక్కడైనా, ఎవరి మీదైనా ఇలాంటి హింసను ఎట్టి పరిస్థితుల్లోనూ అంగీకరించలేం. బాధితురాలికి న్యాయం జరగాలని, ఆమెకు తగిన రక్షణ, మద్దతు లభించాలని ప్రార్థిస్తున్నాను” అని ఆయన పేర్కొన్నారు.

గత కొన్ని నెలలుగా బంగ్లాదేశ్‌లో హిందూ మైనారిటీల పరిస్థితి ఆందోళనకరంగా మారుతోంది. ముఖ్యంగా గత ఏడాది డిసెంబర్ నుంచి హింసాత్మక ఘటనలు గణనీయంగా పెరిగినట్లు నివేదికలు చెబుతున్నాయి. కేవలం రెండు నెలల వ్యవధిలోనే కనీసం ఆరుగురు హిందూ పురుషులు దారుణంగా హత్యకు గురయ్యారని సమాచారం. మృతుల్లో వ్యాపారులు, సాధారణ పౌరులు కూడా ఉన్నారు. వీరిని కాల్చడం, కత్తులతో పొడిచి చంపడం వంటి భయంకర ఘటనలు చోటుచేసుకున్నాయి.

Heartbreaking to read about the brutal assault on a Hindu widow in Bangladesh. Such violence against anyone, anywhere is unacceptable. Prayers for justice and support for the survivor. 🙏

— Shikhar Dhawan (@SDhawan25) January 7, 2026