Ranji Trophy 2026: నితీశ్ రెడ్డి ఫైట్ వృథా.. బెంగాల్ క్వార్టర్ ఫైనల్‌లో ఘన విజయం

రంజీ ట్రోఫీ 2026 క్వార్టర్ ఫైనల్‌లో బెంగాల్‌తో జరిగిన మ్యాచ్‌లో ఆంధ్రప్రదేశ్ జట్టు ఇన్నింగ్స్ 90 పరుగుల తేడాతో ఓటమి పాలైంది. ఫలితం ఆంధ్రకు అనుకూలంగా లేకపోయినా, ఇన్నింగ్స్ పరాజయాన్ని తప్పించేందుకు నితీశ్ కుమార్ రెడ్డి చేసిన అద్భుత పోరాటం అభిమానులను విశేషంగా ఆకట్టుకుంది.

రెండో ఇన్నింగ్స్‌లో నితీశ్ కుమార్ రెడ్డి 144 బంతుల్లో 7 ఫోర్లు, 2 సిక్సర్లతో 90 పరుగులు చేసి ఔటయ్యాడు. టెయిలెండర్లు కేఎస్ నరసింహ రాజు 25 పరుగులు, త్రిపురణ విజయ్ 46 పరుగులతో అతనికి అండగా నిలవడం మ్యాచ్ హైలైట్‌గా నిలిచింది. తొలి ఇన్నింగ్స్‌లోనూ నితీశ్ 33 పరుగులు చేసి, బౌలింగ్‌లో ఒక వికెట్ కూడా పడగొట్టాడు.

అయితే రెండు ఇన్నింగ్స్‌ల్లో నితీశ్ తప్ప మరెవ్వరూ స్థిరంగా రాణించకపోవడంతో ఆంధ్రకు ఇన్నింగ్స్ పరాజయం తప్పలేదు. ఈ విజయంతో బెంగాల్ సెమీఫైనల్‌కు అర్హత సాధించింది.

సెమీఫైనల్ సమీకరణాలు

ఫిబ్రవరి 15న ప్రారంభమయ్యే రెండో సెమీఫైనల్‌లో బెంగాల్ జమ్మూ అండ్ కశ్మీర్‌తో తలపడనుంది. అదే రోజు మొదలయ్యే తొలి సెమీఫైనల్‌లో ఉత్తరాఖండ్ మరియు కర్ణాటక జట్లు పోటీపడతాయి.

ఒక్క పరుగు తేడాతో ట్రిపుల్ సెంచరీ మిస్ చేసిన ఘరామీ

ఈ మ్యాచ్‌లో బెంగాల్ యువ బ్యాటర్ సుదీప్ కుమార్ ఘరామీ అరుదైన రికార్డుకు తృటిలో దూరమయ్యాడు. 43 పరుగులకే మూడు వికెట్లు కోల్పోయిన క్లిష్ట పరిస్థితుల్లో బ్యాటింగ్‌కు దిగిన ఘరామీ, జట్టును ఒంటిచేత్తో ఆదుకుని 299 పరుగుల వ్యక్తిగత స్కోర్ వద్ద ఔటయ్యాడు.

రంజీ ట్రోఫీ చరిత్రలో 299 పరుగుల వద్ద ఒక ఆటగాడు ఔటవడం ఇదే తొలిసారి. 1988–89 సీజన్‌లో మహారాష్ట్ర ఆటగాడు శంతాను సుగ్వేకర్ 299 పరుగుల వద్ద అజేయంగా నిలిచాడు. మొత్తం ఫస్ట్ క్లాస్ క్రికెట్ చరిత్రలో ఇప్పటివరకు కేవలం ముగ్గురు ఆటగాళ్లు మాత్రమే 299 వద్ద ఔటయ్యారు.

చరిత్రాత్మక ఇన్నింగ్స్ వివరాలు

ఘరామీ ఈ ఇన్నింగ్స్‌లో 596 బంతులు ఎదుర్కొని 31 ఫోర్లు, 6 సిక్సర్లతో 299 పరుగులు సాధించాడు. వన్‌డౌన్‌లో బ్యాటింగ్‌కు దిగిన అతను, ఆరో వికెట్‌కు సుమంత్ గుప్తాతో 81 పరుగుల భాగస్వామ్యంతో 165 పరుగులు, ఏడో వికెట్‌కు హబీబ్ గాంధీతో 95 పరుగులతో 221 పరుగుల భారీ భాగస్వామ్యాలు నెలకొల్పాడు.

12 గంటలకు పైగా సాగిన ఈ మారథాన్ ఇన్నింగ్స్ ఆధునిక రంజీ ట్రోఫీ చరిత్రలో అత్యంత సుదీర్ఘ ఇన్నింగ్స్‌లలో ఒకటిగా నిలిచింది. ఒక్క పరుగు తేడాతో ట్రిపుల్ సెంచరీ మిస్ అయిన ఘరామీ నిరాశతో పెవిలియన్ చేరాడు.

భారీ స్కోర్‌తో బెంగాల్ ఆధిపత్యం

ఘరామీ చారిత్రాత్మక ఇన్నింగ్స్ కారణంగా బెంగాల్ తొలి ఇన్నింగ్స్‌లో 629 పరుగుల భారీ స్కోర్ చేసింది. ఆఖరి దశలో టీమిండియా పేసర్ మరియు బెంగాల్ ఆటగాడు మహమ్మద్ షమీ 53 పరుగులతో మెరుపు అర్ధ సెంచరీ సాధించాడు.

ఆంధ్ర తొలి ఇన్నింగ్స్ వివరాలు

దీనికి ముందు ఆంధ్ర తొలి ఇన్నింగ్స్‌లో 295 పరుగులకు ఆలౌటైంది. రికీ భుయ్ 83 పరుగులతో అర్ధ సెంచరీ చేసి టాప్ స్కోరర్‌గా నిలిచాడు. శ్రీకర్ భరత్ 47, షేక్ రషీద్ 46, నితీశ్ కుమార్ రెడ్డి 33 పరుగులతో పర్వాలేదనిపించారు.

బెంగాల్ బౌలింగ్‌లో టీమిండియా పేసర్ ముకేశ్ కుమార్ ఐదు వికెట్లు తీసి చెలరేగగా, ఆకాశ్ దీప్ నాలుగు వికెట్లతో సత్తా చాటాడు. మహమ్మద్ షమీ కూడా ఒక వికెట్ పడగొట్టాడు.

మరిన్నివార్తలుచదవండి: టీ20 వరల్డ్‌కప్‌ 2026: న్యూజిలాండ్‌ ఊచకోత.. యూఏఈపై 10 వికెట్ల ఘన విజయం