ఆస్ట్రేలియాపై పాకిస్తాన్ క్లీన్ స్వీప్, టీ20 సిరీస్‌ను 3–0తో కైవసం

టీ20 ప్రపంచకప్‌కు ముందు స్వదేశంలో ఆస్ట్రేలియాతో జరిగిన మూడు మ్యాచ్‌ల టీ20 సిరీస్‌లో పాకిస్తాన్ పూర్తి ఆధిపత్యం చెలాయించింది. చివరి మ్యాచ్‌లో 111 పరుగుల తేడాతో ఘన విజయం సాధించిన పాక్, సిరీస్‌ను 3–0తో క్లీన్ స్వీప్ చేసి ఆసీస్‌కు షాకిచ్చింది.

మ్యాచ్‌లో తొలుత బ్యాటింగ్ చేసిన పాకిస్తాన్ నిర్ణీత 20 ఓవర్లలో 6 వికెట్ల నష్టానికి 207 పరుగులు చేసింది. అనంతరం భారీ లక్ష్యంతో బరిలోకి దిగిన ఆస్ట్రేలియాను పాక్ బౌలర్లు కేవలం 16.5 ఓవర్లలో 96 పరుగులకే కుప్పకూల్చి తిరుగులేని విజయాన్ని సొంతం చేసుకున్నారు.

బ్యాటింగ్‌లో మెరిసిన సైమ్ అయూబ్, బాబర్ ఆజమ్

పాకిస్తాన్ ఇన్నింగ్స్‌లో సైమ్ అయూబ్ 56 పరుగులతో అద్భుతంగా ఆడగా, బాబర్ ఆజమ్ అజేయంగా 50 పరుగులు చేసి ఇన్నింగ్స్‌కు స్థిరత్వం అందించాడు. చివరి ఓవర్లలో షాదాబ్ ఖాన్ కేవలం 19 బంతుల్లో 46 పరుగులు చేసి మ్యాచ్ దిశను పూర్తిగా మార్చేశాడు. అతని ఇన్నింగ్స్‌లో రెండు ఫోర్లు, ఐదు సిక్సర్లు ఉన్నాయి.

మిగతా బ్యాటర్లలో ఖ్వాజా నఫే 21, ఫకర్ జమాన్ 10, ఫహీం అష్రాఫ్ 10 నాటౌట్‌గా నిలిచారు. ఆసీస్ బౌలర్లలో డ్వార్షుయిస్ రెండు వికెట్లు తీయగా, గ్రీన్, కన్నోలీ, షార్ట్, కుహ్నేమన్ తలో వికెట్ సాధించారు.

బౌలింగ్‌లో నవాజ్ విధ్వంసం

భారీ లక్ష్య ఛేదనలో ఆస్ట్రేలియా బ్యాటర్లు పూర్తిగా చేతులెత్తేశారు. మొహమ్మద్ నవాజ్ అద్భుత బౌలింగ్‌తో ఆసీస్‌పై విరుచుకుపడ్డాడు. నాలుగు ఓవర్లలో 18 పరుగులిచ్చి ఐదు వికెట్లు తీసి మ్యాచ్‌ను ఏకపక్షంగా మార్చేశాడు.

ఆస్ట్రేలియా ఇన్నింగ్స్‌లో స్టోయినిస్ 23, గ్రీన్ 22, జోష్ ఫిలిప్ 14 పరుగులు మాత్రమే రెండంకెల స్కోర్లు చేశారు. మార్ష్, షార్ట్, రెన్‌షా, కన్నోలీ తదితరులు పూర్తిగా విఫలమయ్యారు. ఆడమ్ జంపా బ్యాటింగ్‌కు దిగలేదు.

ఈ సిరీస్‌లో తొలి రెండు మ్యాచ్‌ల్లో కూడా పాకిస్తాన్ భారీ విజయాలు సాధించింది. ప్రపంచకప్‌ను దృష్టిలో ఉంచుకుని ఆస్ట్రేలియా సీనియర్ ఆటగాళ్లకు విశ్రాంతినిచ్చి ద్వితీయ శ్రేణి జట్టుతో బరిలోకి దిగింది. అయినప్పటికీ పాక్ ప్రదర్శన పూర్తి ఆధిపత్యాన్ని చూపించింది.

మరిన్నివార్తలుచదవండి: పీఎస్ఎల్‌పై ఫవాద్ సర్వర్ సంచలన వ్యాఖ్యలు, ఇంగ్లాండ్ ఆటగాళ్లకు ఎన్‌ఓసీ ఇవ్వబోరన్న వాదన