ఆషెస్‌ 2025–26: అడిలైడ్‌ టెస్ట్‌కు ప్యాట్‌ కమిన్స్‌ రీ-ఎంట్రీ దాదాపు ఖాయం!

ఆస్ట్రేలియా జట్టు కెప్టెన్‌, ప్రపంచంలోనే టాప్‌ ఫాస్ట్‌ బౌలర్‌ ప్యాట్‌ కమిన్స్‌ చివరకు అంతర్జాతీయ క్రికెట్‌లోకి తిరిగి రాబోతున్నాడు. నెలల తరబడి గాయం కారణంగా దూరంగా ఉన్న ఈ స్టార్‌ పేసర్‌, ఇప్పుడు అడిలైడ్‌లో జరగబోయే మూడో ఆషెస్‌ టెస్ట్‌లో ఆడే అవకాశం దాదాపు ఖాయమైంది.

కమిన్స్‌కు వెన్నెముకలో బోన్‌ స్ట్రెస్‌ ఇంజరీ రావడంతో చాలాకాలం రెహాబ్‌లోనే గడిపాడు. ఇటీవల మళ్లీ బౌలింగ్‌ ప్రారంభించినా, జట్టు మేనేజ్‌మెంట్‌ అత్యంత జాగ్రత్తతో బ్రిస్బేన్‌లో జరిగిన పింక్‌ బంతి టెస్ట్‌కు అతన్ని దూరంగా పెట్టింది. పూర్తి ఫిట్‌నెస్‌ వచ్చిన తర్వాతే ఆడిస్తామని వారు నిర్ణయించారు.

రెండో టెస్ట్‌ మూడో రోజు ఫాక్స్‌ క్రికెట్‌తో మాట్లాడిన కమిన్స్‌ “అడిలైడ్‌కు నేను సిద్ధమవుతున్నాను. ఇంకా రెండు బౌలింగ్‌ సెషన్లు మాత్రమే మిగిలి ఉన్నాయి. ఏదైనా అనుకోని సమస్యలు రాకపోతే ఖచ్చితంగా ఆడతాను. శరీరం ఇప్పుడు చాలా బాగుంది” అని చెప్పాడు. అయితే, రెహాబ్‌ నుంచి నేరుగా టెస్ట్‌లోకి దూకి రెండు రోజులు వరుసగా బౌలింగ్‌ చేయడం పెద్ద ఛాలెంజ్‌ అని కూడా అంగీకరించాడు.

హేజిల్‌వుడ్‌ లేకుండానే ఆసీస్‌ పేసర్లు అదరగొట్టిన ప్రదర్శన

ఇప్పటివరకు జోష్‌ హేజిల్‌వుడ్‌ కూడా గాయంతో బయట ఉండటంతో ఆసీస్‌ పేస్‌ అటాక్‌లో ఇద్దరు సీనియర్‌ బౌలర్లు లేకున్నా, జట్టు బాగా పోరాడింది. మిచెల్‌ స్టార్క్‌ ముందుండి వికెట్లు తీస్తూ అద్భుతంగా నేతృత్వం వహించాడు. బ్రెండన్‌ డాగెట్‌, స్కాట్‌ బోలాండ్‌, మైకల్‌ నేసర్‌ కూడా అదరగొట్టే ప్రదర్శన చేసి ఇంగ్లండ్‌ బ్యాటర్లను తీవ్ర ఇబ్బందులకు గురిచేశారు.

కమిన్స్‌ తిరిగి వస్తే ఆస్ట్రేలియా బౌలింగ్‌ యూనిట్‌కు మళ్లీ పూర్తి బలం వచ్చినట్టే. అంతేకాదు, కెప్టెన్‌గా అతని టాక్టికల్‌ బ్రెయిన్‌, కంట్రోల్‌, బ్యాలెన్స్‌, ఇవన్నీ సిరీస్‌ డెసైడ్ చేసే దశలో కీలక పాత్ర పోషించనున్నాయి.

ఇక ముందు మూడు టెస్టులు కీలకం. మూడో టెస్ట్‌ డిసెంబర్‌ 17–21 వరకు అడిలైడ్‌ ఓవల్‌లో, బాక్సింగ్‌ డే టెస్ట్‌ డిసెంబర్‌ 26–30 వరకు ఎంసీజీలో, చివరి టెస్ట్‌ జనవరి 4–8 వరకు సిడ్నీలో జరగనున్నాయి. ఈ మూడు మ్యాచ్‌ల్లో ఎవరు ఆషెస్‌ ట్రోఫీని కైవసం చేసుకుంటారో చూడాలి. టెన్షన్‌ పీక్స్‌కు చేరుకుంది!