షాహీన్ అఫ్రిదీకి గాయం: బిగ్ బాష్ లీగ్ నుంచి అవుట్, T20 వరల్డ్ కప్ 2026పై ఆందోళన

పాకిస్థాన్ స్టార్ పేసర్ షాహీన్ షా అఫ్రిదీ ఆస్ట్రేలియా గడ్డపై గట్టి షాక్ ఎదుర్కొన్నారు. బిగ్ బాష్ లీగ్‌లో మెరుపులు మెరిపించే లక్ష్యంతో వెళ్లిన ఈ స్పీడ్‌స్టర్, అనూహ్యంగా గాయంతో బారినపడి టోర్నీ నుంచి అర్ధాంతరంగా వైదొలిగారు.

పాకిస్థాన్ క్రికెట్ బోర్డు (PCB) ఆదేశాల మేరకు, ఫిబ్రవరి–మార్చి నెలల్లో భారత్, శ్రీలంక వేదికలుగా జరగబోయే టీ20 వరల్డ్ కప్ దృష్ట్యా రిస్క్ తీసుకోవడం కష్టమని భావించి అతను స్వదేశానికి తిరిగి రావాలని నిర్ణయం తీసుకుంది.

గాయం వివరణ
బ్రిస్బేన్ హీట్ జట్టుకు చెందిన షాహీన్, డిసెంబర్ 27న అడిలైడ్ స్ట్రైకర్స్‌తో జరిగిన మ్యాచ్‌లో గాయమయ్యారు. 14వ ఓవర్లో బౌలింగ్ చేస్తున్నప్పుడు కుడి మోకాలికి తీవ్రమైన నొప్పి రావడంతో, మైదానంలోనే నిలబడలేక, మధ్యలోనే డ్రెస్సింగ్ రూమ్‌కు వెళ్ళిపోయారు. గాయం తీవ్రతను గుర్తించిన PCB, అతనికి సరైన చికిత్స కోసం వెంటనే పాకిస్థాన్‌కు తిరిగి రావాలని కోరింది.

షాహీన్ స్పందన
తన నిష్క్రమణపై షాహీన్ సోషల్ మీడియాలో ఇలా పేర్కొన్నారు:
“బ్రిస్బేన్ హీట్ జట్టు మరియు ఫ్యాన్స్ చూపించిన ప్రేమకు నేను ఎల్లప్పుడూ రుణపడి ఉంటాను. ఊహించని గాయం కారణంగా బోర్డు నన్ను వెనక్కి పిలిచింది. త్వరలోనే మళ్లీ మైదానంలోకి వస్తానని ఆశిస్తున్నాను. అప్పటి వరకు నా జట్టుకు బయట నుంచే మద్దతు ఇస్తాను.”

ఫిబ్రవరిలో జరగబోయే వరల్డ్ కప్ కోసం అతని ఫిట్‌నెస్ చాలా కీలకం. అందుకే PCB మెడికల్ టీమ్ పర్యవేక్షణలో అతనికి చికిత్స అందించనుంది.

బిగ్ బాష్ సీజన్ పరిస్థితి
ఈ సీజన్ షాహీన్ కోసం సరిగా అనుకూలంగా రాలేదు. ఆడిన నాలుగు మ్యాచ్‌లలో కేవలం రెండు వికెట్లు మాత్రమే సాధించారు. ఎకానమీ రేటు 11.19గా ఉండటంతో బ్యాటర్లు అతడిని చిత్తు చేశారు. డెబ్యూ మ్యాచ్‌లోనే రెండు బీమర్లు వేసినందుకు అంపైర్లు అతడిని బౌలింగ్ నుంచి తొలగించారు. సీజన్ ప్రారంభంలోనే ఇలాంటి అపశ్రుతి, ఇప్పుడు గాయంతో మొత్తం సీజన్‌ను మిస్ కావడం అతని ఫ్యాన్స్‌కు నిరాశ కలిగిస్తోంది.

మరిన్నివార్తలుచదవండి: డబ్ల్యూపీఎల్ 2026కు ముందే ఆర్సీబీ, ఢిల్లీ క్యాపిటల్స్‌కు భారీ షాక్