Smriti Mandhana: స్మృతి మంధానకు మరో షాక్.. మొదట తండ్రి, తరువాత కాబోయే భర్తకు అస్వస్థతతో ఆగిపోయిన పెళ్లి

భారత మహిళా క్రికెట్ జట్టు వైస్-కెప్టెన్, ప్రముఖ బ్యాటర్ స్మృతి మంధాన జీవితంలో నవంబర్ 23 ప్రత్యేక రోజుగా మారాల్సి ఉన్నప్పటికీ, అనుకోని పరిణామాలు ఆమె కుటుంబాన్ని ఆందోళనకు గురి చేశాయి. అదే రోజు సాయంత్రం 4.30 గంటలకు బాలీవుడ్ సంగీత దర్శకుడు పలాష్ ముచ్చల్‌తో ఆమె వివాహం జరగాల్సి ఉంది. అయితే ఉదయం జరిగిన అనూహ్య సంఘటనల వల్ల ఈ శుభ కార్యక్రమాన్ని వాయిదా వేయాల్సి వచ్చింది.

రోజు ప్రారంభంలోనే స్మృతి తండ్రి శ్రీనివాస్ మంధానకు అకస్మాత్తుగా ఛాతిలో నొప్పి ఏర్పడడంతో కుటుంబ సభ్యులు వెంటనే ఆయనను సాంగ్లీ లోని సర్వహిత్ ఆస్పత్రికి తీసుకెళ్లారు. వైద్యులు చేసిన పరీక్షల్లో అది గుండెపోటు అని తేలింది.

ఆస్పత్రి కార్డియాలజీ విభాగం ఆయనను నిరంతరం పర్యవేక్షిస్తోందని, పూర్తిగా కోలుకోవడానికి ఇంకా కొన్ని రోజులు ఆస్పత్రిలోనే ఉండాల్సి ఉంటుందని డాక్టర్ నమన్ షా తెలిపారు. పెళ్లి ఏర్పాట్లలో జరిగిన పరుగులు, శారీరక అలసట, మానసిక ఒత్తిడి ఇవన్నీ ఈ పరిస్థితికి కారణమై ఉండొచ్చని వైద్యులు భావిస్తున్నారు.

ఇంతలో, పెళ్లి రోజు కావడంతో ఒత్తిడి పెరిగిన సమయంలో స్మృతి కాబోయే వరుడు పలాష్ ముచ్చల్ కూడా అస్వస్థతకు గురయ్యాడు. ఆయనకు వైరల్ ఇన్‌ఫెక్షన్, అలసటతో పాటు ఎసిడిటీ సమస్యలు కనిపించడంతో, కుటుంబ సభ్యులు అప్రమత్తంగా ఉండేందుకు ఆయనను కూడా వైద్య పరీక్షల కోసం దవాఖానకు తీసుకెళ్లారు.

అయితే వైద్యులు పలాష్ ఆరోగ్యం సాధారణంగానే ఉందని, పెద్దగా ఆందోళన చెందాల్సిన అవసరం లేదని తెలిపారు. కొద్దిసేపటి చికిత్స అనంతరం ఆయనను డిశ్చార్జ్ చేసి హోటల్‌కు పంపించారు. ప్రస్తుతం పలాష్ ఆరోగ్యం మెరుగ్గా ఉంది.

ఒకే రోజు స్మృతి తండ్రి గుండెపోటుకు గురికావడం, వెంటనే పలాష్ కూడా అస్వస్థతకు లోనవడంతో పెళ్లి వేడుకను పూర్తిగా నిలిపివేయాల్సి వచ్చింది. ప్రస్తుతం మంధాన కుటుంబం మొత్తం శ్రీనివాస్ మంధాన ఆరోగ్యం పైనే దృష్టి పెట్టింది. పరిస్థితి పూర్తిగా సవ్యంగా మారిన తర్వాత కొత్త పెళ్లి తేదీని ప్రకటించాలనే నిర్ణయానికి ఇరు కుటుంబాలు వచ్చాయి.

దేశంలో అత్యంత అభిమానించబడే క్రికెటర్లలో ఒకరైన స్మృతి మంధాన వ్యక్తిగత జీవితం ఇలా ఆందోళనకర పరిస్థితిని ఎదుర్కోవడంతో, అభిమానులు ఆమె కుటుంబానికి ధైర్యం చెప్తూ, తండ్రి త్వరగా కోలుకోవాలని సోషల్ మీడియాలో అభిలాషలు తెలుపుతున్నారు.

మరిన్ని వార్తలు చదవండి: Punjab Kings: శ్రేయస్ అయ్యర్ గాయంపై షాకింగ్ అప్‌డేట్… జట్టుకు భారీ దెబ్బ!