తిలక్ వర్మ గాయం: టీమిండియాలో స్థానం కోసం అయ్యర్, గిల్, పంత్ పోటీ

టీమిండియా మిడిల్ ఆర్డర్ బ్యాటర్ తిలక్ వర్మ గాయపడ్డాడు. డొమెస్టిక్ క్రికెట్ టోర్నీ విజయ్ హజారే ట్రోఫీలో ఆడుతున్న సమయంలో ఈ హైదరాబాద్ క్రికెటర్‌కు గజ్జల్లో గాయం అయ్యింది. గాయం తీవ్రంగా ఉండటంతో తిలక్‌కు హాస్పిటల్‌లో సర్జరీ చేయాల్సి వచ్చింది. వైద్యుల సూచనల ప్రకారం అతడు మూడు నుంచి నాలుగు వారాల పాటు పూర్తిగా విశ్రాంతి తీసుకోవాల్సి ఉంటుంది.

ఈ కారణంగా స్వదేశంలో జనవరి 21 నుంచి ప్రారంభం కానున్న టీ20 సిరీస్‌కు తిలక్ వర్మ దూరమయ్యాడు. వరల్డ్ కప్‌కు ముందు టీమిండియాకు ఇది పెద్ద ఎదురుదెబ్బ అని చెప్పవచ్చు. ఒకవేళ వరల్డ్ కప్ సమయానికి కూడా తిలక్ పూర్తిగా ఫిట్ కాకపోతే, అతని స్థానంలో ఎంపిక కావడానికి ముగ్గురు క్రికెటర్లు పోటీలో ఉన్నారు. వాళ్లు ఎవరో ఇప్పుడు చూద్దాం.

శ్రేయాస్ అయ్యర్

తిలక్ వర్మ స్థానానికి ప్రధానంగా రేస్‌లో ఉన్న ఆటగాడు శ్రేయాస్ అయ్యర్. ప్రస్తుతం అయ్యర్ పూర్తి ఫిట్‌నెస్‌తో ఉన్నాడు. ఇటీవల జరిగిన విజయ్ హజారే ట్రోఫీలో అద్భుతంగా రాణించి తన ఫామ్‌తో పాటు ఫిట్‌నెస్‌ను కూడా నిరూపించుకున్నాడు. మిడిల్ ఆర్డర్ బ్యాటర్ కావడం అతనికి ప్లస్ పాయింట్. ఐపీఎల్ 2025 సీజన్‌లో 600కి పైగా పరుగులు చేసి తన సత్తా చాటాడు. అనుభవం కలిగిన ఆటగాడు కావడం వల్ల టీమిండియాకు అతని ఎంపిక ఉపయోగపడే అవకాశముంది.

శుభమాన్ గిల్

పేలవ ఫామ్ కారణంగా ఇటీవల టీమిండియా జట్టులో స్థానం కోల్పోయిన శుభమాన్ గిల్‌కు మళ్లీ అవకాశం దక్కే సూచనలు కనిపిస్తున్నాయి. గిల్ క్లాస్ ప్లేయర్. ఒకసారి ఫామ్‌లోకి వచ్చాడంటే అతన్ని ఆపడం కష్టం. దక్షిణాఫ్రికా సిరీస్ వరకు వైస్ కెప్టెన్‌గా కొనసాగిన గిల్, అనూహ్యంగా జట్టులో చోటు కోల్పోయాడు. అయితే తిలక్ గాయంతో గిల్‌కు అవకాశం రావచ్చు. కానీ ఓపెనర్ కావడం అతనికి కొంత మైనస్‌గా మారే అవకాశం ఉంది.

రిషబ్ పంత్

టెస్ట్ క్రికెట్‌లో అద్భుతంగా రాణిస్తున్న రిషబ్ పంత్‌కు ఇటీవల వన్డే, టీ20 జట్లలో అవకాశాలు తగ్గాయి. అయితే ఇప్పుడు అతనికి మరో సువర్ణావకాశం వచ్చింది. మిడిల్ ఆర్డర్‌లో బ్యాటింగ్ చేయగలగడం, వికెట్ కీపింగ్ చేయడం అతనికి అడ్వాంటేజ్‌గా మారాయి. 2024 టీ20 వరల్డ్ కప్‌లో మూడో స్థానంలో బ్యాటింగ్ చేసి పర్వాలేదనిపించాడు. ప్రస్తుతం ఫామ్‌లో లేకపోయినా, టీమిండియా మేనేజ్‌మెంట్ అతనిపై మరోసారి నమ్మకం ఉంచే అవకాశముంది.

మరిన్నివార్తలుచదవండి: ముంబై, ఢిల్లీ ఆటగాళ్లకే ఛాన్స్? రాబిన్ ఊతప్ప షాకింగ్ కామెంట్స్