అండర్ 19 వరల్డ్ కప్‌లో మెరిసిన ఆర్ ఎస్ అంబరీశ్ మరో హార్దిక్ పాండ్యా అవుతాడా

జింబాబ్వే వేదికగా జరుగుతున్న అండర్ 19 వరల్డ్ కప్ 2026 టోర్నీలో భారత యువజట్టు వరుస విజయాలతో దూసుకెళ్తోంది. తొలి మ్యాచ్‌లో అమెరికా జట్టును ఆరు వికెట్ల తేడాతో ఓడించిన ఆయుష్ మాత్రే సేన, ఆపై బంగ్లాదేశ్‌పై 18 పరుగుల తేడాతో విజయం సాధించింది.

ఇక శనివారం జరిగిన మ్యాచ్‌లో న్యూజిలాండ్‌తో తలపడిన యువ భారత్ డీఎల్ఎస్ పద్ధతిలో ఏడు వికెట్ల తేడాతో ఘన విజయం సాధించింది. దీంతో హ్యాట్రిక్ విజయాలు నమోదు చేసి టోర్నీలో తమ ఆధిపత్యాన్ని చాటింది. ఈ మ్యాచ్‌లో భారత ఆల్‌రౌండర్ ఆర్ ఎస్ అంబరీశ్ కీలక పాత్ర పోషించాడు.

నాలుగు వికెట్లతో మ్యాచ్‌ను మలిచిన అంబరీశ్

న్యూజిలాండ్ అండర్ 19 జట్టుతో జరిగిన ఈ మ్యాచ్‌లో అంబరీశ్ నాలుగు వికెట్లు తీసి ప్రత్యర్థి బ్యాటింగ్ క్రమాన్ని పూర్తిగా కుదేలుచేశాడు. అతడి అద్భుత ప్రదర్శనకు ప్రశంసల జల్లు కురుస్తోంది. కేవలం పద్దెనిమిదేళ్ల వయసులోనే ఇలాంటి స్థిరమైన ప్రదర్శన చూపిస్తుండటంతో, భవిష్యత్తులో టీమిండియాకు మరో హార్దిక్ పాండ్యా లాంటి ఆల్‌రౌండర్ దొరికే అవకాశముందని క్రికెట్ విశ్లేషకులు అభిప్రాయపడుతున్నారు.

మరో హార్దిక్ పాండ్యా అవుతాడా

హార్దిక్ మాదిరిగానే ఆరో స్థానంలో బ్యాటింగ్ చేయగల సామర్థ్యం, కొత్త బంతితో వేగంగా బౌలింగ్ చేయగల నైపుణ్యం అంబరీశ్‌కు ఉండటం అతడిని ప్రత్యేకంగా నిలబెడుతోంది. తమిళనాడుకు చెందిన ఆర్ ఎస్ అంబరీశ్ ఎడమచేతి వాటం బ్యాటర్ కాగా, కుడిచేతితో ఫాస్ట్ మీడియం పేస్ బౌలింగ్ చేస్తాడు. పేస్ బౌలింగ్ ఆల్‌రౌండర్‌గా అతడిలో మంచి భవిష్యత్ కనిపిస్తోంది.

తండ్రి కలను నిజం చేస్తున్న కుమారుడు

కూచ్ బెహర్ ట్రోఫీలో తమిళనాడు జట్టుకు కెప్టెన్‌గా వ్యవహరించిన అంబరీశ్, 33 ఏళ్ల తర్వాత జూనియర్ రెడ్ బాల్ క్రికెట్‌లో జట్టుకు ట్రోఫీ అందించాడు. అతడి తండ్రి ఆర్ సుకుమార్ కూడా ఒకప్పుడు క్రికెటర్. జూనియర్ స్థాయిలో కెప్టెన్‌గా కొనసాగినప్పటికీ, సీనియర్ జట్టులో చోటు దక్కలేదు. అనంతరం రైల్వేస్‌లో సెక్యూరిటీ ఉద్యోగం చేస్తూ, తన కలను కుమారుడి ద్వారా నెరవేర్చుకోవాలని ఆశపడ్డాడు.

ఆ ఆశయాన్ని అంబరీశ్ నిజం చేస్తూ చిన్ననాటి నుంచే క్రికెట్‌పై ప్రత్యేక దృష్టి పెట్టాడు. ఇప్పటికే తమిళనాడు తరఫున రెండు ఫస్ట్ క్లాస్ మ్యాచ్‌లు ఆడిన అతడు, భారత అండర్ 19 జట్టులోనూ కీలక సభ్యుడిగా మారాడు.

గత ఏడాది జూన్‌లో ఇంగ్లండ్ గడ్డపై జరిగిన యూత్ వన్డే సిరీస్ ద్వారా యాభై ఓవర్ల ఫార్మాట్‌లో అంతర్జాతీయ అనుభవం పొందిన అంబరీశ్, అప్పటి నుంచి జట్టులో తన స్థానాన్ని బలపరుచుకున్నాడు.

ప్రస్తుత వరల్డ్ కప్‌లో మూడు మ్యాచ్‌లు ఆడిన ఈ యువ ఆల్‌రౌండర్ ఇప్పటివరకు ఐదు వికెట్లు పడగొట్టాడు. న్యూజిలాండ్‌తో మ్యాచ్‌లో నాలుగు వికెట్లు తీసి ప్లేయర్ ఆఫ్ ది మ్యాచ్‌గా నిలిచాడు. ఇలాంటి ప్రదర్శన కొనసాగితే త్వరలోనే టీమిండియా జట్టులోకి అడుగుపెట్టడం ఆశ్చర్యకరం కాదని క్రికెట్ వర్గాలు అభిప్రాయపడుతున్నాయి.

మరిన్నివార్తలుచదవండి: SA20 ఫైనల్: ప్రిటోరియా క్యాపిటల్స్‌పై సన్‌రైజర్స్ ఈస్టర్న్ కేప్ ఘన విజయం