టీ20 ప్రపంచకప్ 2026కు ముందు ఆస్ట్రేలియా జట్టుకు భారీ ఎదురుదెబ్బ తగిలింది. ఆ జట్టు విధ్వంసకర బ్యాటర్ టిమ్ డేవిడ్ హ్యామ్ స్ట్రింగ్ గాయానికి గురయ్యాడు. బిగ్ బాష్ లీగ్ 2025–26 సీజన్లో భాగంగా పెర్త్ స్కార్చర్స్తో జరిగిన మ్యాచ్లో బ్యాటింగ్ చేస్తుండగా, హోబర్ట్ హరికేన్స్ తరఫున ఆడుతున్న డేవిడ్కు తొడ కండరాల గాయం ఏర్పడింది.
151 పరుగుల లక్ష్యాన్ని ఛేదించే క్రమంలో హోబర్ట్ హరికేన్స్ ఆరంభంలోనే మూడు కీలక వికెట్లు కోల్పోయి ఒత్తిడిలో పడింది. ఆ సమయంలో క్రీజులోకి వచ్చిన టిమ్ డేవిడ్ ప్రత్యర్థి బౌలర్లపై దూకుడుగా ఆడాడు. కేవలం 26 బంతుల్లో 41 పరుగులు సాధించి జట్టును తిరిగి పోటీలోకి తీసుకొస్తున్న వేళ, అనూహ్యంగా అతడికి గాయం తగిలింది.
సింగిల్ తీసే ప్రయత్నంలో అతడి కుడి తొడ వెనుక భాగంలోని కండరాలు పట్టేయడంతో నొప్పితో విలవిలలాడాడు. వెంటనే ఫిజియో మైదానంలోకి వచ్చి పరీక్షించినప్పటికీ, తీవ్రమైన నొప్పితో డేవిడ్ మైదానాన్ని వీడాల్సి వచ్చింది. అతడి పరిస్థితిని గమనిస్తే గాయం తీవ్రంగా ఉన్నట్లు తెలుస్తోంది. స్కాన్ నివేదికలు వచ్చిన తర్వాతే గాయం తీవ్రతపై స్పష్టత రానుంది.
ఏదేమైనా, టిమ్ డేవిడ్ వంటి కీలక ఆటగాడు ప్రపంచకప్కు ముందు గాయపడటం ఆస్ట్రేలియా జట్టును ఆందోళనకు గురి చేస్తోంది. ఒకవేళ గాయం గ్రేడ్ వన్గా తేలితే కోలుకోవడానికి సుమారు మూడు వారాలు పడుతుంది. అదే గ్రేడ్ టూ అయితే రెండు నుంచి మూడు నెలలు, గ్రేడ్ త్రీగా నిర్ధారణ అయితే మూడు నెలలు లేదా అంతకంటే ఎక్కువ సమయం పట్టే అవకాశం ఉంది.
టిమ్ డేవిడ్ ఐపీఎల్లో రాయల్ ఛాలెంజర్స్ బెంగళూరు తరఫున ఆడుతున్న సంగతి తెలిసిందే. దీంతో అతడు త్వరగా కోలుకోవాలని ఆర్సీబీ అభిమానులు ఆశిస్తున్నారు. అలాగే టీ20 ప్రపంచకప్ 2026 ఫిబ్రవరి 7 నుంచి ప్రారంభం కానుండటంతో, అతడి ఫిట్నెస్పై అందరి దృష్టి నిలిచింది.
మరిన్నివార్తలుచదవండి: ఫ్యాన్ దురుసు వ్యాఖ్యలు చేశాడు.. కానీ హార్దిక్ పాండ్యా స్పందన మాత్రం క్లాస్!
