2026 టీ20 వరల్డ్ కప్కు టీమిండియా యువ ఓపెనర్ శుభమాన్ గిల్పై వేటు పడింది. ఫామ్ లేమితో ఇబ్బంది పడుతున్న గిల్ను చివరకు సెలక్టర్లు జట్టులో నుంచి తప్పించారు. ఆసియా కప్ 2025 నుంచి గిల్ను బలవంతంగా ఓపెనర్గా కొనసాగించారు. ఆ తర్వాత ఆస్ట్రేలియా పర్యటనలోనూ, తాజాగా దక్షిణాఫ్రికా సిరీస్లోనూ విఫలమైనప్పటికీ అతనికి వరుస అవకాశాలు ఇచ్చారు. సంజూ శాంసన్ లాంటి ఫామ్లో ఉన్న ఆటగాడిని పక్కనపెట్టి గిల్ను జట్టులో కొనసాగించడంపై తీవ్ర విమర్శలు వచ్చాయి. ఎంత నమ్మకంతో అవకాశాలు ఇచ్చినా గిల్ విఫలమవుతూ జట్టుకు భారంగా మారాడనే అభిప్రాయం బలంగా వ్యక్తమైంది.
వైస్ కెప్టెన్గా గిల్ కొనసాగుతుండటంతో అతన్ని జట్టులో నుంచి తప్పించడం కష్టంగా మారింది. అయితే చివరకు వరల్డ్ కప్ జట్టు నుంచి శుభమాన్ గిల్ను ఎందుకు తప్పించారో టీమిండియా కెప్టెన్ సూర్యకుమార్ యాదవ్, చీఫ్ సెలక్టర్ అజిత్ అగార్కర్ స్పష్టత ఇచ్చారు. గిల్ ఎంపికపై ఇద్దరూ వేర్వేరు కారణాలను వెల్లడించారు.
కెప్టెన్ సూర్యకుమార్ మాట్లాడుతూ, “మాకు ఓపెనర్గా వికెట్ కీపర్ ఉంటే జట్టుకు మంచి సమతుల్యం వస్తుందని భావించాం. ఈ ఫార్మాట్లో ఇషాన్ కిషన్ ఓపెనర్గా కూడా, వికెట్ కీపర్గా కూడా ఆడగలడు” అని తెలిపారు.
చీఫ్ సెలక్టర్ అజిత్ అగార్కర్ మాట్లాడుతూ, “గిల్ ఎంత క్వాలిటీ ప్లేయరో అందరికీ తెలుసు. అయితే ఈ మధ్య కాలంలో అతను పరుగులు చేయడంలో ఇబ్బంది పడుతున్నాడు. దురదృష్టవశాత్తు గత వరల్డ్ కప్లోనూ గిల్కు స్థానం దక్కలేదు. అప్పుడు వేర్వేరు కాంబినేషన్లతో వెళ్లాల్సి వచ్చింది. 15 మంది స్క్వాడ్ను ఎంపిక చేసే సమయంలో ఎవరో ఒకరు తప్పక మిస్ అవ్వాలి. ఈసారి అది గిల్ వంతు అయింది” అని అన్నారు.
టీ20 వైస్ కెప్టెన్గా ఉన్నప్పటికీ శుభమాన్ గిల్ ఫామ్ టీమిండియాకు ఆందోళన కలిగిస్తోంది. ఆసియా కప్ నుంచి ఇప్పటివరకు గిల్ ఒక్కసారి కూడా హాఫ్ సెంచరీ సాధించలేకపోయాడు. కాన్బెరాలో జరిగిన తొలి టీ20లో మాత్రమే కెప్టెన్ సూర్యకుమార్తో కలిసి కొంతవరకు మెప్పించాడు. ఆ తర్వాత నాలుగో వన్డేలో 46 పరుగులు చేసి సరే అనిపించాడు. దక్షిణాఫ్రికాతో జరిగిన తొలి టీ20లో మాత్రం కేవలం 4 పరుగులకే పెవిలియన్ చేరాడు. కొన్ని అడపాదడపా ఇన్నింగ్స్లు తప్ప గిల్ నుంచి పెద్దగా ప్రభావవంతమైన ప్రదర్శనలు రావడం లేదు.
గిల్ చివరి 15 ఇన్నింగ్స్లను పరిశీలిస్తే 20(9), 10(7), 5(8), 47(28), 29(19), 4(3), 12(10), 37*(20), 5(10), 15(12), 46(40), 29(16), 4(2), 0(0), 28(28) ఇలా ఉన్నాయి. ఇందులో కేవలం మూడు సార్లు మాత్రమే 30 పరుగుల మార్క్ను దాటాడు. దక్షిణాఫ్రికాతో జరిగిన రెండో టీ20లో తొలి బంతికే డకౌట్ అయ్యాడు. మూడో టీ20లో 28 పరుగులు చేసినప్పటికీ అందుకు 28 బంతులు తీసుకున్నాడు. ఈ ప్రదర్శనలతో గిల్ స్థానంలో సంజూ శాంసన్కు అవకాశం ఇవ్వాలనే డిమాండ్ మరింత బలంగా వినిపించింది.
మరిన్ని వార్తలు చదవండి: కెమెరామెన్కు క్షమాపణలు చెప్పి ఆలింగనం చేసిన హార్దిక్ పాండ్యా
